१. पीडाबोध
परिरहेकै छ
यो छोटो जीवनमा
मैले
धेरैसँग धेरै कुरा लिन
( जीवनभरको
पीडा
यही रह्यो मेरो )
आफूले आजसम्म
सकिरहेको छैन
आफैँ जन्मेको धर्तीलाई समेत
अँगालो मारेर रुन ।
२. तिमी र म
तिमी
कुर्सीको मान्छे
म
धर्तीको मान्छे
त्यसैले त तिमीलाई
केवल कुर्सीकै मोह छ
अनि मलाई
सधैँभरि
धर्तीकै मोह छ।
३. खुसी
तिम्रो ओठको हाँसो
नुनिलो आँसुसँग साटेको फूल होइन भने
म ठोकुवा गर्छु-
तिमीले
खुसीसँग परिचय साट्नै बाँकी छ।
४. अस्तित्वको सङ्कट
तिमी वर्तमान पुस्ता
र
म पुरानो सिक्का !
हामी त
एकअर्काका प्रतिलिपि पो रहेछौँ
दुवै
प्रतिपल खिइरहेका
दुवै
सधैँ
अस्तित्वकै सङ्कटमा
जिइरहेका।
